Уладзімір Пуцін гатовы абмяркоўваць з Дональдам Трампам спыненне агню ва Украіне, але настойвае на сваіх ранейшых умовах пра неўступленне Украіны ў NATO і іншых. Пра гэта піша Reuters са спасылкай на свае крамлёўскія крыніцы.
Як піша агенцтва, пяць цяперашніх і былых расійскіх чыноўнікаў заявілі, што Крэмль можа ў цэлым пагадзіцца замарозіць канфлікт уздоўж лініі фронту. Пры гэтым Расія не пацярпіць уступлення Украіны ў NATO ці прысутнасці войскаў NATO на ўкраінскай тэрыторыі. Кіеў таксама мусіць узяць на сябе абавязанне не абмяжоўваць выкарыстанне рускай мовы і скараціць колькасць сваіх узброеных сіл.
Паводле трох крыніц, перамовы могуць весціся пра дакладны падзел Данецкай, Луганскай, Запарожскай і Херсонскай абласцей, каля 70−80% тэрыторыі якіх цяпер акупаваныя Расіяй. Паводле двух чыноўнікаў, Расія таксама можа быць гатовая сысці з адносна невялікіх участкаў тэрыторыі, якія яна ўтрымлівае ў Харкаўскай і Мікалаеўскай абласцях.
Дзве крыніцы паведамілі, што рашэнне цяперашняга прэзідэнта ЗША Джо Байдэна дазволіць Кіеву выкарыстоўваць ракеты ATACMS для ўдараў па Расіі можа ўскладніць і затрымаць любое ўрэгуляванне — і зрабіць больш жорсткімі патрабаванні Масквы, бо прыхільнікі жорсткай лініі настойваюць на большым кавалку Украіны, піша Reuters.
Паводле дзвюх крыніц, калі пагадненне пра спыненне агню не будзе дасягнутае, Расія прадоўжыць вайну.
Агенцтва таксама прыводзіць меркаванне Дзмітрыя Саймса, якога называе «адным з найбольш аўтарытэтных расійскіх экспертаў у пытаннях Амерыкі». Амерыканскі палітолаг, які працуе ў РФ, лічыць, што пагадненне пра спыненне агню можа быць заключанае адносна хутка. У той жа час дасягнуць больш шырокага, доўгачасовага пагаднення, якое б улічвала інтарэсы бяспекі як Украіны, так і Расіі, будзе надзвычай складана, «бо пазіцыі абодвух бакоў вельмі далёкія адна ад адной», дадаў ён.
«Гэты варыянт нам не падыдзе»
Афіцыйны прадстаўнік Крамля Дзмітрый Пяскоў, каментуючы інфармацыю, якая з’явілася ў Reuters заявіў, што варыянту замарозіць канфлікт Масква не разглядае.
«Прэзідэнт неаднаразова, а дакладней пастаянна заяўляе, што ён гатовы да кантактаў і перамоваў. Прэзідэнт гэтак жа ўжо казаў, што нейкі варыянт замарозкі канфлікту нам не падыдзе. Нам важна дасягнуць сваіх мэтаў, якія ўсім добра вядомыя», — заявіў Пяскоў.
Уладзімір Пуцін агучыў умовы пачатку перамоваў з Кіевам у чэрвені 2024 года. Сярод іх ён назваў нейтральны, пазаблокавы, бяз’ядзерны статус Украіны, яе дэмілітарызацыю і «дэнацыфікацыю»; прызнанне статусу Крыма, Севастопаля, самаабвешчаных ДНР і ЛНР, Херсонскай і Запарожскай абласцей як суб’ектаў Расійскай Федэрацыі «ў межах тых адміністрацыйных межаў, якія існавалі ў момант іх уваходжання ва Украіну»; скасаванне ўсіх заходніх санкцый супраць Расіі.
Прэзідэнт Украіны Уладзімір Зяленскі 16 лістапада заявіў, што перамовы з Расіяй магчымыя пры ўмове знаходжання Украіны ў мацнейшай пазіцыі. А пасярэднік у гэтых перамовах не мусіць быць нейтральным і выразна рэтрансляваць, што «Расія — агрэсар, што яна парушыла нашую тэрытарыяльную цэласнасць, міжнароднае права». Пры гэтым Зяленскі дадаў, што неабходна зрабіць усё, каб у 2025 годзе вайна была скончаная.