Самалёт з Беларусі зайшоў у паветраную прастору Літвы ў пятніцу раніцай. Праляцеўшы паміж Алітусам і Друскінінкаем, ён дасягнуў тэрыторыі Польшчы і далей павярнуў на поўдзень. Пра гэта сведчаць звесткі партала сачэння за самалётамі Flightradar24, піша Delfi.
Каб даведацца, што адбылося, журналісты звярнуліся па каментар у кампанію па кіраванні паветраным рухам і сувязі Oro navigacija. Там расказалі, што гэты самалёт не парушыў санкцыйнага рэжыму.
«Краіна рэгістрацыі самалёта — Турцыя (TCMAY), рэйс выконваўся з Мінска (Беларусь) у Стамбул (Турцыя). Самалёт ляцеў без пасажыраў. Санкцыі не ўжываюцца да такіх палётаў, таму гэты самалёт мог перасекчы паветраную прастору Літвы», — заявілі Delfi ў Oro navigacija.
Пасадка Ryanair у Мінску і даклад ICAO
Нагадаем, беларускія ўлады 23 траўня 2021 года змусілі лайнер авіякампаніі Ryanair, які ляцеў з Афін у Вільнюс, здзейсніць экстранную пасадку ў Мінску, заявіўшы, што атрымалі паведамленне пра бомбу, якая нібыта знаходзіцца на борце. Распараджэнне ляцець у сталіцу Беларусі пілоты атрымалі за некалькі хвілін да ўваходжання самалёта ў паветраную прастору Літвы. Для яго суправаджэння паднялі знішчальнік МіГ-29 беларускіх ВПС. Пасля пасадкі самалёта Ryanair у Мінску бомбы на борце не знайшлі, аднак былі затрыманыя два пасажыры — Раман Пратасевіч і яго сяброўка Соф’я Сапега.
Пасля інцыдэнту Рада ЕС забараніла беларускім самалётам выкарыстоўваць еўрапейскую паветраную прастору і аэрапорты. Пазней да санкцый далучыліся і краіны, якія не ўваходзяць у ЕС: Паўночная Македонія, Чарнагорыя, Сербія і Албанія, Ісландыя, Ліхтэнштэйн і Нарвегія, а таксама Украіна.
Еўрасаюз таксама рэкамендаваў еўрапейскім перавозчыкам адмовіцца ад палётаў у паветранай прасторы Беларусі.
Рада міжнароднай арганізацыі грамадзянскай авіяцыі (ICAO) 20 ліпеня 2022 года паставіла кропку ў расследаванні інцыдэнту з самалётам Ryanair. Каманда ICAO, якая расследавала тое, што адбылося, выпусціла абноўлены даклад, у якім ёсць сведчанні пра датычнасць беларускіх уладаў да інцыдэнту. У прыватнасці, у ім ёсць паказанні дыспетчара, які працаваў у цэнтры кіравання, а таксама аўдыёзапісы, зробленыя ім у дзень інцыдэнту.
У МЗС Беларусі заявілі, што «даклад змяшчае масу прабелаў і нестыковак», а таксама прывялі два «фэйкі» са справаздачы ICAO. Першы — «у высновах рабочай групы наогул не згадваюцца нейкія высокапастаўленыя чыноўнікі Беларусі, якія паўплывалі на прымусовую пасадку рэйса ў Мінску». Запіс перамоваў з дыспетчарскім пункце, дзе акрамя самога дыспетчара і яго начальніка прысутнічае неназваная персона, што падказвае рэплікі, якія неабходна перадаць пілоту самалёта Ryanair, у МЗС назвалі другім фэйкам, бо «смартфоны праносіць у дыспетчарскі пункт нельга».