Маштабны абмен зняволенымі паміж Расіяй і Захадам прайшоў 1 жніўня ў Анкары (Турцыя), у ім удзельнічалі 26 чалавек. У канцылярыі прэзідэнта Турцыі пацвердзілі, што сярод вызваленых — памілаваны ў Беларусі немец Рыка Крыгер.
Крыніца ў Белым доме пацвердзіла CNN, што Расія і ЗША дамовіліся пра абмен зняволенымі.
Усяго ў абмене зняволенымі паміж Расіяй, ЗША, Германіяй і іншымі краінамі Захаду фігуруе больш за 20 чалавек, паведамляе тэлекампанія CBS. Паводле звестак выдання, у Расіі вызваленыя трое зняволеных амерыканскіх грамадзян, у тым ліку рэпарцёр Wall Street Journal Эван Гершковіч, былы марскі пяхотнік Пол Уілан і журналістка «Радыё Свабода» Алсу Курмашова.
Сярод грамадзян РФ, якія ўдзельнічаюць у абмене, — Вадзім Красікаў, асуджаны за забойства чачэнскага палявога камандзіра Зелімхана Хангашвілі ў Германіі ў 2019 годзе. У сваю чаргу, крытык Крамля і журналіст Washington Post Уладзімір Кара-Мурза будзе дастаўлены ў ЗША. Ён грамадзянін Вялікабрытаніі і Расіі і ўладальнік грын-карты, яго сям’я жыве ў ЗША.
Угода каардынавалася шэрагам урадавых ведамстваў ЗША, уключаючы Белы дом, Дзярждэпартамент і ЦРУ. Яе падрабязнасці ўвесь гэты час трымаліся ў сакрэце.
Як паведамляе турэцкі тэлеканал NTV, абмен 26 зняволенымі паміж Расіяй, Беларуссю, ЗША, Германіяй, Польшчай, Славеніяй і Нарвегіяй прайшоў 1 жніўня ў аэрапорце Анкары. Там прызямліўся самалёт Ту-204 лётнага атрада «Расія». Паводле звестак канала, дзесяць вызваленых у рамках абмену ў Анкары скіроўваюцца ў Расею, 13 — у Германію і трое — у ЗША.
Паводле звестак NTV, у абмене таксама ўдзельнічалі двое дзяцей. Як мяркуе «Сирена», гэта могуць быць дзеці расійскіх разведчыкаў Арцёма і Ганны Дульцавых, якія жылі ў Славеніі.
Турэцкае агенцтва IHA сцвярджае, што працэс курыравала ўпраўленне разведкі Турцыі.
Паводле звестак выдання The Insider, Расія вызваліла:
- рэпарцёра Wall Street Journal Эвана Гершковіча,
- журналіста і палітыка Уладзіміра Кара-Мурзу,
- былую кіраўніцу ўфімскага штаба Навальнага Лілію Чанышаву,
- палітыка Іллю Яшына,
- экс-дэпутатку Томскай думы Ксенію Фадзееву,
- былога кіраўніка «Адкрытай Расіі» Андрэя Піваварава,
- былога марпеха, амерыканца Пола Уілана,
- журналістку Алсу Курмашову,
- праваабаронцу, старшыню «Мемарыяла» Алега Арлова,
- мастачку Сашу Скачыленка,
- палітолага Дзітэра Вароніна,
- 18-гадовага фігуранта справы пра дзяржздраду Кевіна Ліка,
- памілаванага ў Беларусі Рыка Крыгера,
- абвінавачанага ў кантрабандзе немца Патрыка Шобеля,
- піцерскага актывіста Германа Мойжэса,
- экс-кіраўніка штаба Навальнага ў Барнауле Вадзіма Астаніна.
У сваю чаргу заходнія краіны пагадзіліся аддаць:
- былога афіцэра спецназа Вадзіма Красікава (з Германіі),
- асуджаных за шпіянаж на карысць РФ Арцёма Дульцава і Ганну Дульцаву (са Славеніі),
- абвінавачанага ў працы на расійскую разведку Міхаіла Мікушына (з Нарвегіі),
- арыштаванага па абвінавачанні ў шпіянажы на карысць Расіі Паўла Рубцова (з Польшчы),
- сына дэпутата Дзярждумы ад ЛДПР Рамана Селязнёва, асуджанага на 27 гадоў за кібермахлярства (з ЗША),
- заснавальніка і гендырэктара IT-кампаніі M13 Уладзіслава Клюшына, прызнанага вінаватым у кібермахлярстве на фондавым рынку (з ЗША),
- абвінавачанага ў кантрабандзе тэхналогій (у тым ліку ядзерных) і амерыканскіх боепрыпасаў для ВПК Расіі Вадзіма Канашчонка (з ЗША).
Афіцыйнага пацверджання інфармацыі ўсіх прозвішчаў пакуль няма. Аднак канцылярыя прэзідэнта Турцыі пацвердзіла, што Вадзім Красікаў знаходзіцца сярод вызваленых. Грамадзянін Германіі Рыка Крыгер, асуджаны на смяротнае пакаранне і памілаваны ў Беларусі, таксама выйдзе на волю, паведамляе Bild. А вызваленне Кевіна Ліка пацвердзіла яго група падтрымкі.
Нагадаем, раніцай 1 жніўня выданне «Агентство. Новости» расказала пра тое, што самалёт Ан-148 з бартавым нумарам RA-61727 прыляцеў у Калінінград з маскоўскага аэрапорта Унукава. Самалёты гэтага тыпу выкарыстоўваліся падчас абмену Віктара Бута, Канстанціна Ярашэнкі, а таксама Надзеі Саўчанка на расіян.
Раней тэлеканал N1, партнёр CNN у Славеніі, паведаміў, што абмен паміж Расіяй, ЗША, Германіяй і Беларуссю можа адбыцца ў найбліжэйшыя гадзіны.
Крыніца The Moscow Times расказала, што падчас абмену Расія можа вызваліць ад 20 да 30 палітычных зняволеных і журналістаў.
У Крамлі адмовіліся каментаваць інфармацыю пра абмен зняволенымі. Аднак прэс-сакратар Уладзіміра Пуціна Дзмітрый Пяскоў паабяцаў, што гэта адбудзецца «ў свой час» — магчыма, ужо сёння.
Чытайце таксама
