Дэпутаты польскага Сейма вынеслі вотум недаверу прэм’ер-міністру Матэвушу Маравецкаму, тым самым адмовіўшыся падоўжыць яго паўнамоцтвы. Цяпер фармаваннем урада краіны зоймецца аб’яднаная апазіцыя на чале з Дональдам Тускам.
Падчас паседжання Сейма 11 снежня дэпутаты выказалі вотум недаверу цяперашняму прэм’ер-міністру, прадстаўніку партыі «Права і справядлівасць» Матэвушу Маравецкаму, кандыдатуру якога прапанаваў прэзідэнт Польшчы Анджэй Дуда. На галасаванні ўрад Маравецкага падтрымалі 190 чалавек, супраць выказаліся 266.
Такім чынам, «Права і справядлівасць» перастала быць кіроўнай партыяй у Польшчы пасля васьмі гадоў, цягам якіх яе прадстаўнікі ўзначальвалі ўрад краіны.
Цяпер фармаваннем кабінета зоймецца аб’яднаная апазіцыя, якая складаецца з альянсаў «Грамадзянская кааліцыя» (KO), «Трэцяя дарога» і «Левыя».
Галоўным кандыдатам на пасаду польскага прэм’ера стаў Дональд Туск, лідар партыі «Грамадзянская платформа» і былы кіраўнік Еўрапейскага савета, якая атрымала другое месца на выбарах.
Чакаецца, што ўжо найбліжэйшым часам парламент выдасць Туску мандат на фармаванне новага кабінета, а 12 снежня дэпутаты прагаласуюць за вынясенне яму вотуму даверу.
У выпадку прызначэння Туск зойме пасаду прэм’ера, пасля яго прысягу прыме Анджэй Дуда. Гэта адбудзецца не раней за 13 снежня, да гэтага часу Маравецкі застанецца на пасадзе.
