Асуджаныя па пратэсных справах могуць разлічваць на памілаванне. Пра гэта ў эфіры дзяржтэлеканала «Беларусь 1» заявіла намесніца кіраўніка Адміністрацыі Аляксандра Лукашэнкі Вольга Чупрыс.
Паводле яе, летась у Беларусі былі «адзінкавыя выпадкі памілавання асуджаных за ўдзел у пратэстах». У 2022 годзе 77% ад усёй колькасці памілаваных склалі тыя, хто здзейсніў злачынствы «так званай пратэснай скіраванасці», а ў 2021-м — 40%.
«Гэта пра што кажа? Нягледзячы на тое, што гэтыя асобы сябе супрацьпаставілі краіне, інтарэсам краіны, у складаны перыяд для нашай дзяржавы, прэзідэнт іх памілаваў. Прэзідэнт іх убачыў, прэзідэнт даў ім шанец на годнае жыццё, даў шанец на інтэграцыю ў нашае грамадства. То-бок ён, увогуле, ім паверыў», — сказала Чупрыс.
Нагадаем, сёння, 13 сакавіка, Аляксандр Лукашэнка падпісаў указ пра памілаванне 15 чалавек. Іх імёны, а таксама артыкулы, па якіх яны былі асуджаныя, не называюцца.
На нарадзе 11 студзеня Аляксандр Лукашэнка прапанаваў падысці да амністыі-2024 «нетрадыцыйна», але атрымалася як заўсёды: яна не закране асуджаных за «экстрэмізм» і «тэрарызм».