Сілавікі разграмілі кватэру Дзяніса Дудзінскага і Кацярыны Раецкай. Відэа ўчыненага пагрому апублікаваў 12 ліпеня набліжаны да ГУБАЗіК тэлеграм-канал.
Набліжаныя да сілавых структураў крыніцы абвінавацілі Дзяніса Дудзінскага ў тым, што ён у сваіх публічных выступах «не раз заяўляў пра падтрымку тэрарызму і выказваў гатоўнасць аказаць садзейнічанне дыверсійным групам».
«Распачатая крымінальная справа. У яго дзвюх кватэрах былі праведзеныя ператрусы ў мэтах выяўлення схованак і іншых прыкмет садзейнічання тэрарызму», — паведаміў набліжаны да ГУБАЗіК тэлеграм-канал.
Па выніках «ператрусу» было апублікаванае відэа. У роліку можна заўважыць, як дагледжаная кватэра пасля візіту сілавікоў аказалася разгромленай.
Нагадаем, Дзяніс Дудзінскі, які раней працаваў на тэлеканале «Беларусь 1», і ягоная жонка Кацярына Раецкая з’ехалі з Беларусі ва Украіну летам 2021 года. Пасля пачатку вайны яны пераехалі ў Польшчу.
У верасні 2020 года Дзяніс Дудзінскі атрымаў 10 сутак арышту за ўдзел у несанкцыянаваным масавым мерапрыемстве (артыкул 24.23 КаАП). У кастрычніку яго аштрафавалі па гэтым жа артыкуле на 675 рублёў (каля 270 даляраў).
Чытайце таксама
