У пачатку сакавіка тэлеканал АНТ паведаміў, што ў Беларусі затрымалі выхавальніка, які дзесяць гадоў гвалтаваў дзяцей і здымаў усё на камеру. МУС заявіла, што ахвярамі педафіла стала мінімум 70 дзяцей. Паводле чытачоў «Люстэрка», усё гэта адбывалася ў невялікім населеным пункце Віцебскай вобласці. Расказваем, што пра яго вядома.
З этычных меркаванняў і з меркаванняў бяспекі імя суразмоўніцы змененае. Яе звесткі ёсць у рэдакцыі.
Затрыманы Мікалай працаваў выхавальнікам у адным з дзіцячых садкоў Віцебскай вобласці. Гэты дзіцячы садок мясцовыя жыхары называюць паміж сабой «элітным». Ён знаходзіцца ў цэнтры, і калі сям’я не жыве побач, запісацца туды цяжка. Знаёмая затрыманага Марыя апісвае яго як «таленавітага, культурнага і спакойнага чалавека».
— Калі б не доказы ў выглядзе відэа, ніколі б не паверыла, — прызнаецца жанчына. — Дзеці яго любяць. Наколькі я ведаю, у старэйшых групах яго ведалі многія хлопцы і дзяўчаты, нават тыя, у каго ён не быў выхавальнікам. Ён таксама праводзіў дні нараджэння для хлопчыкаў і дзяўчынак, у тым ліку для сваіх выхаванцаў.
Мяркуючы па сацсетках Мікалая, яму 41 год, нарадзіўся ён у тым жа населеным пункце, дзе жыў і працаваў. Не жанаты, дзяцей няма. Яго бацька — былы міліцыянт, мама — супрацоўніца бальніцы.
Марыя кажа, што ў Мікалая быў свой дом і ён жыў асобна ад бацькоў. Паводле словаў нашай суразмоўніцы, мужчына любіць падарожнічаць, на яго старонцы «ВКонтакте» — фота з розных краін.
Паводле знаёмай, Мікалай працаваў не толькі ў садку, але таксама вёў гарадскія мерапрыемствы. На сайце садка ёсць інфармацыя, што ён кіраваў спартовым танцавальным кружком:
— Здаецца, яму прапаноўвалі стаўку ў Доме культуры, ён адмовіўся. Сказаў, што любіць дзяцей. Хоць па зарплаце і адказнасці ў культуры лягчэй.
Пра іншы бок жыцця Мікалая даведаліся выпадкова. Паводле звестак АНТ, маці з малагадовым сынам зайшлі ў краму і сустрэлі там выхавальніка. Хлопчык на яго адрэагаваў негатыўна — замітусіўся і схаваўся за маму. Увечары жанчына завяла з сынам даверлівую размову. І тут дзіця, якое так любіла гуляць з выхавальнікам, раптам назвала яго кепскім.
— Ён сказаў пра тое, што гэты чалавек рабіў з імі кепскія рэчы, — казала мама пацярпелага хлопчыка ў эфіры АНТ. — Калі дзеці засыналі, ён засоўваў руку пад коўдру і пэўныя маніпуляцыі здзяйсняў. Яшчэ яго сябар падвяргаўся такім жа дзеянням з боку дарослага.
Паводле інфармацыі АНТ, мужчына ўсё здымаў, у яго знайшлі 400 гігабайтаў дзіцячага порна. Пра тое, што ў мужчыны былі відэа таго, што ён рабіў з дзецьмі, кажа і нашая суразмоўніца.
— Казалі, у камп’ютары ў яго ўсё па папках, усё падпісанае, — расказвае Марыя. — Чула, адной з мамаў следчы тэлефанаваў, пытаўся пра сына — ён таксама ходзіць у гэты садок. Сказаў, цікавяць толькі хлопчыкі.
Як менавіта ўсё адбывалася, Марыя не ведае.
— У горадзе кажуць, што ў суботы ў садку ён нейкія дадатковыя заняткі праводзіў для дзяцей, якія ў школу збіраюцца, некаторыя дадому дзяцей да яго вадзілі. Але гэта ўсё чуткі, — працягвае суразмоўніца.
На пытанне, як так доўга дзеянні Мікалая маглі заставацца ў таямніцы ў маленькім населеным пункце, у Марыі адказу няма:
— Магчыма, ён быў добрым псіхолагам. Кажуць, былі бацькі, якіх насцярожвалі паводзіны педагога. Яны звярталіся да адміністрацыі садка, але ім адказвалі, што Мікалай — найлепшы выхавальнік.
Як стала вядома «Люстэрку», пасля здарэння дырэктарка дзіцячага садка звольнілася, а начальніка мясцовага аддзела адукацыі знялі з пасады.
У дзіцячым садку нам пацвердзілі, што загадчыца звольнілася. Каментаваць сітуацыю там адмовіліся. Былая кіраўніца ўстановы на нашае паведамленне ў сацсетках не адказала. У аддзеле па адукацыі гаварыць пра сітуацыю таксама не сталі. Толькі ўдакладнілі, што ранейшы начальнік больш не працуе.
