Увечары 1 сакавіка, праз амаль 4 дні пасля інцыдэнту на аэрадроме Мачулішчаў, дзяржСМІ апублікавалі відэа, на якім самалёт А-50 коціцца па ўзлётна-пасадачнай паласе. Раніцай 2 сакавіка з’явіўся запіс, як гэты самалёт ідзе на ўзлёт, а пазней — як ён ляціць на вышыні. Паводле дзяржСМІ, ён у поўным парадку і інфармацыя пра дыверсіі — фэйк. Пасля такіх заяваў BYPOL апублікаваў відэа з аднаго з дронаў. Праўда, на ім няма момантаў выбухаў, пра якія заяўляла ініцыятыва.
На запісе відаць, як дрон рухаецца на невялікай вышыні ў кірунку самалёта А-50, які стаіць на аэрадроме. Пазней ён прызямляецца на абцякальнік РЛС — тая самая «талерка» зверху самалёта. Аднак выбухаў, пра якія заяўляла ініцыятыва, на відэа няма. Сам ролік у BYPOL назвалі «РАЗВЕДКА! ДРЛВ А-50У на аэрадроме МАЧУЛІШЧЫ!»
— Беларускія партызаны цягам 2-х тыдняў з дапамогай дронаў цывільнага прызначэння, набытых у краме, вялі авіяразведку на вайсковым аэрадроме «Мачулішчы», — заявілі ў BYPOL. — Падчас адной з паспяховых аперацый разведкі дрон не толькі залятаў на ахоўваную тэрыторыю названага аэрадрома, пралятаў паблізу расійскага ваеннага самалёта ДРЛВ А-50У, але нават садзіўся на ягоную радыёлакацыйную станцыю («талерку»).
Нагадаем, мы высветлілі, што гэта дрон DJI FPV — толькі гэтая мадэль кітайскага вытворцы абсталёўваецца акулярамі для кіравання палётам. Поўны камплект свабодна прадаецца ў Беларусі, сёння яго можна набыць, напрыклад, за 5695 рублёў. Без мадыфікацыі такі квадракоптар можа кіравацца і перадаваць відэасігнал на далёкасці да 10 кіламетраў і мае максімальную хуткасць палёту да 140 кіламетраў у гадзіну.
ДзяржСМІ сцвярджаюць, што А-50 ўзляцеў на баявое дзяжурства, аднак тэлеграм-канал «Беларускі Гаюн» заяўляе, што самалёт пакінуў паветраную прастору Беларусі і скіраваўся на рамонт у Таганрог. Ні тую, ні тую заяву праверыць неспецыялістам праверыць немагчыма, бо звесткі пра палёт гэтага самалёта не адлюстроўваюцца ў даступных звычайным карыстальніка праграмах кшталту Flightradar24, якія паказваюць траекторыю палёту самалёта.
