Прадпрымальніца з Беларусі падзялілася ў TikTok гісторыяй пра тое, як уласнымі дзеяннямі зменшыла сабе памер пенсіі да «зневажальна-абразлівай сумачкі». Істотнае скарачэнне штомесячных выплат здарылася пасля аднаго-адзінага плацяжу ў Фонд сацыяльнай абароны насельніцтва (ФСАН), піша Telegraf.news.
Сваім сумным досведам падзялілася беларуская прадпрымальніца, якая публікуе ролікі ў TikTok пад нікам iryna_bim. Паводле жанчыны, афіцыйна на пенсію яна выйшла ў чэрвені 2024 года і з таго часу акуратна атрымлівала належныя ад дзяржавы штомесячныя выплаты.
Аднак, паколькі яна была індывідуальным прадпрымальнікам (ІП), падчас афармлення дакументаў на атрыманне пенсіі жанчына пацікавілася ў ФСАН, ці трэба ёй рабіць абавязковыя адлічэнні ў фонд за астатнія пяць месяцаў каляндарнага года. Будучы, як выказалася сама прадпрымальніца, «законапаслухмяным грамадзянінам», яна зрабіла ўнёсак у ФСАН на суму 1100 рублёў.
«Упраўленне сацыяльнай абароны мне пенсію на той момант ужо налічыла, бо ў мяне страхавога стажу хапала і без гэтых пяці месяцаў. Напэўна, нават калі б я спынілася і перастала працаваць гады два-тры таму, у мяне б і так хапала страхавога стажу. Я ўсё жыццё працую», — расказала аўтарка ў сваім роліку, адзначыўшы, што агульны працоўны стаж у яе больш за 40 гадоў, то-бок яна ветэран працы.
Пасля таго як ва ўпраўленні сацыяльнай абароны правялі пераразлік і залічылі жанчыне гэтыя пяць месяцаў індывідуальнага прадпрымальніцтва, ёй прыйшло афіцыйнае паведамленне пра змяншэнне памеру пенсіі на 65 рублёў.
«То-бок трэба заплаціць 1100 рублёў за тое, каб мне назаўжды, на ўсё астатняе жыццё, зрэзалі пенсію», — зрабіла парадаксальную выснову аўтарка роліка.
@iryna_bim Мой рассказ о том, как я сократила себе пенсию лишними платежами в ФСЗН #Оплатитьфсзн #пенсия ♬ оригинальный звук — Irena_Bim
Як так атрымалася?
Такі прававы парадокс адбыўся праз тое, што агульны перыяд індывідуальнага прадпрымальніцтва з параўнальна невялікімі адлічэннямі ў ФСАН павялічыўся адносна агульнага страхавога стажу і перыяду працы на дзяржаўным прадпрыемстве са значна большым заробкам (і, такім чынам, з вялікімі адлічэннямі ў ФСАН). Гэта прывяло да пераліку каэфіцыенту, зыходзячы з якога разлічваецца выніковая пенсія.
«Разлік пенсіі і каэфіцыенту пенсійнага ідзе за 30 апошніх гадоў. Таму так і атрымалася, што першапачаткова ў мяне і каэфіцыент быў вышэйшы, і перыяд працы дзяржаўнай быў даўжэйшы на пяць месяцаў», — патлумачыла прадпрымальніца.
Дакладную суму, якую ёй налічылі ў выніку, жанчына не агучыла, але назвала яе «зневажальна-абразлівай сумачкай». А вось некаторыя іншыя прадпрымальнікі, якія адгукнуліся ў каментарах пад відэа з падобнымі гісторыямі, не пасаромеліся назваць памеры сваіх пенсій. Так, са словаў адной глядачкі з працоўным стажам прадпрымальніка 30 гадоў, яна атрымлівае каля 480 рублёў (то-бок крыху больш за мінімальную пенсію па ўзросце, якая ў студзені 2025 года складае 459,76 рубля з асноўнымі даплатамі).
«Мне 60 гадоў, з 92-га года ІП, плачу ў ФСАН больш, чым тыя, хто працуе, а пенсія будзе слёзы», — выказалася іншая глядачка.
«Я да 30 гадоў больш зарабляла і працавала. Пасля 33 гадоў — два дэкрэты, і цяпер на самазанятасці. Нават лічыць баюся, у мінус пайду», — падзялілася сваімі перажываннямі на гэты конт жанчына, якую гэтыя праблемы толькі чакаюць у далёкай будучыні.
Зрэшты, знайшліся і тыя, хто не знайшоў нічога парадаксальнага ў сітуацыі, адзначыўшы, што «ўсё зроблена па законе».
«Заплацілі ад мінімалкі 35%, вось і атрымалі мінімалку, а што вы хацелі? Заплацілі б ад хаця б сярэдняй — нічога б не зрэзалі. Чаму арганізацыі павінныя плаціць ад фактычнага заробку, а ІП — толькі ад мінімалкі?» — задаўся пытаннем адзін з гледачоў.
Ад чаго залежыць памер пенсіі ў Беларусі?
Раней начальніца галоўнага ўпраўлення пенсійнага забяспечання Міністэрства працы і сацыяльнай абароны Алена Гомарава патлумачыла, што памер пенсій у Беларусі залежыць ад двух асноўных фактараў: ад працягласці стажу і ад памеру заработнай платы, з якой працадаўца выплачваў страхавыя ўнёскі.
Адпаведна, калі беларус сабраў да моманту выхаду на пенсію афіцыйныя 30 гадоў стажу, то яго штомесячныя выплаты ад дзяржавы будуць вышэйшыя, чым у таго, хто, напрыклад, працаваў 25 гадоў жыцця. Да таго ж, чым большы заробак, тым большая і пенсія, патлумачылі ў Мінпрацы.
«Не залежыць памер пенсіі ад месца пражывання, не залежыць ад выкананай працы, а залежыць ад вышэйзгаданых параметраў. Больш працуем — больш атрымліваем заработную плату і больш высокую пенсію», — патлумачыла Гомарава.
Чытайце таксама
