У Польшчы затрымалі заказчыка нападу на паплечніка Аляксея Навальнага, расійскага апазіцыянера Леаніда Волкава ў Вільнюсе — гэта грамадзянін Беларусі, паведаміў польскі прэм’ер-міністр Дональд Туск. Раней стала вядома пра затрыманне меркаваных выканаўцаў злачынства — двух грамадзян Польшчы.
— Затрыманы беларус, які працуе на расіян і які замовіў двум палякам забойства паплечніка Навальнага, — заявіў Дональд Туск.
Раней стала вядома, што ў Польшчы затрыманыя двое падазраваных у нападзе на Волкава. Паводле прэзідэнта Літвы Гітанаса Наўседы, абодва — грамадзяне Польшчы. Туск дадаў, што яны звязаныя з коламі фанатаў ультрас.
Затрыманне адбылося 3 красавіка ў выніку сумесных дзеянняў польскіх і літоўскіх праваахоўнікаў. Паводле звестак літоўскай паліцыі, перад нападам на паплечніка Навальнага мужчыны паехалі ў Вільнюс, а потым вярнуліся ў Варшаву.
Прэс-сакратар Варшаўскага суда Яана Адамовіч заявіла, што падазраваныя «дзейнічалі ў складзе арганізаванай групы і выконвалі заказы спецслужбаў чужой краіны». Яны арыштаваныя да 13 траўня. Калі мужчын прызнаюць вінаватымі ў нанясенні цялесных пашкоджанняў Волкаву, ім пагражае да трох гадоў пазбаўлення волі, паведамляе AP.
Нагадаем, увечары 12 сакавіка ў Вільнюсе з малатком напалі на паплечніка Аляксея Навальнага, апазіцыянера Леаніда Волкава. Яму разбілі акно ў машыне і распылілі ў вочы слезацечны газ, пасля чагопачалі біць Волкава малатком. Яго даставілі ў бальніцу, але выпісалі на наступны дзень. Сам палітык лічыць, што за тым, што адбылося, стаяць расійскія ўлады. У Літве тады паабяцалі прыцягнуць вінаватых да адказнасці.
