Супрацоўнікам Следчага камітэта хочуць дазволіць атрымліваць інфармацыю пра фізічных асоб з розных інфармацыйных сістэм. Прычым без згоды саміх людзей. А яшчэ — мець дыстанцыйны доступ да такіх рэсурсаў. Гэта прадугледжвае законапраект «Пра змяненне законаў» (па пытаннях Следчага камітэта), які на мінулым тыдні ў першым чытанні прыняў парламент. Пры гэтым у дакуменце досыць абстрактна акрэслена, пра якія інфармацыйныя сістэмы гаворка.
Супрацоўнікі СК і цяпер маюць права запытваць і атрымліваць на бязвыплатнай аснове ад дзяржорганаў і іншых арганізацый інфармацыю, патрэбную для выканання ўскладзеных на ведамства задач. Цяпер чыноўнікі хочуць дапоўніць гэты пункт закона «Пра Следчы камітэт Рэспублікі Беларусь». Яны збіраюцца прапісаць, што СК зможа без згоды фізічных асоб атрымліваць звесткі з інфармацыйных сістэм, якія змяшчаюць персанальныя звесткі, а таксама мець доступ да іх, у тым ліку дыстанцыйны.
Таксама чыноўнікі хочуць:
- павялічыць памежны ўзрост прыёму на службу ў СК з 25 да 28 гадоў;
- прыбраць абавязак штогод падаваць дэкларацыі пра даходы і маёмасць у супрацоўнікаў шараговага і малодшага начальніцкага складу СК;
- надаваць статус супрацоўнікаў СК тым, хто залічаны ва ўстанову вышэйшай адукацыі МУС для атрымання вышэйшай адукацыі па спецыяльнасцях для Следчага камітэта.
«Законапраект скіраваны на ўдасканаленне прававога рэгулявання парадку надавання Следчаму камітэту паўнамоцтваў на апрацоўку персанальных звестак, штогадовага дэкларавання даходаў і маёмасці супрацоўнікамі СК, прыёму на службу ў названы камітэт, на ўдакладненне статусу курсанта Следчага камітэта», — кажуць у парламенце.
Чытайце таксама
