Палітычны аналітык Арцём Шрайбман пракаментаваў выданню «Салідарнасць» рашэнне беларускіх уладаў забараніць грамадзянам краіны, якія з’ехалі за мяжу, мяняць і падаўжаць пашпарты ў амбасадах Беларусі.
— У новаўвядзеннях з пашпартамі для эмігрантаў, мне здаецца, усё досыць відавочна. Для ўлады гэта спосаб пакараць нелаяльную да іх частку беларусаў, якую яны ў прынцыпе хочуць з беларусаў выпісаць, — адзначыў Арцём Шрайбман. — Акрамя таго, частка людзей, якія рызыкнуць вярнуцца, каб вырашыць нейкія праблемы з пашпартамі ці з нерухомасцю, можна будзе арыштаваць. Значыць, і сілавікі выканаюць нейкія паказчыкі.
Суразмоўца падкрэсліў, што беларускім рэжымам рухае жаданне пакараць людзей, якія вымушаныя былі з’ехаць з краіны, за нелаяльнасць.
— Гэта іх магчымасць даць зразумець тым, хто з’ехаў, што дзяржава працягвае імкнуцца іх пакараць, як заўгодна ўскладняючы ім жыццё, нават не маючы магчымасці да іх дацягнуцца. Зразумела, што эмігрантаў чакае мноства бюракратычных праблем і складаных рашэнняў. Думаю, што ў сувязі з гэтым узрасце папулярнасць як ідэі пашпарта Новай Беларусі і запыт на яе. Вырасце попыт на міжнародную абарону і іншыя статусы ў дэмакратычных краінах, якія даюць магчымасць аформіць праязны дакумент. Тыя, у каго ёсць магчымасць атрымаць грамадзянства іншай дзяржавы, паскораць гэты працэс.
Нагадаем, беларускія дыпмісіі больш не будуць выдаваць пашпарты беларусам, якія пастаянна жывуць за мяжой. Абмяняць пашпарт або падоўжыць тэрмін яго дзеяння таксама будзе нельга. Такія змены прадугледжаныя ўказам Аляксандра Лукашэнкі, тэкст якога апублікаваны на яго сайце.
Чытайце таксама
