ЗША ўвялі санкцыі супраць трох арганізацый і дзевяці фізічных асоб з Беларусі. Сярод іх — МАЗ, БЕЛАЗ, ЦВК і іх кіраўнікі. Пра гэта паведамляе прэс-служба Міністэрства фінансаў ЗША.
Увядзенне новых санкцый ва Упраўленні кантролю за замежнымі актывамі Міністэрства фінансаў ЗША (OFAC) тлумачаць адказам на «жорсткія рэпрэсіі, якія працягваюцца супраць прадэмакратычнага руху і грамадзянскай супольнасці ў сувязі з ашуканскімі прэзідэнцкімі выбарамі ў жніўні 2020 года». У ведамстве заявілі, што «гэтыя дзеянні таксама падкрэсліваюць гатоўнасць Злучаных Штатаў заклікаць рэжым у Минску да адказу за яго саўдзел у неабгрунтаванай вайне Расійскай Федэрацыі супраць Украіны».
У санкцыйным спісе аказаліся два дзяржаўныя аўтагіганты — МАЗ і БЕЛАЗ, а таксама іх кіраўнікі Валерый Іванковіч і Сяргей Нічыпаровіч.
Абмежаванні ўвялі таксама супраць ЦВК і новага складу, сярод якіх Ігар Карпенка, Алена Балдоўская, Дзяніс Дук, Алена Кунцэвіч, Аляксандр Ткачоў, Кацярына Фядосенка і Аляксандр Южык.
У спісе таксама ўрадавы самалёт EW-001PA — Boeing 737. «Лукашэнка мае эксклюзіўны доступ да EW-001PA і іншых раскошных самалётаў і выкарыстоўвае іх для асабістых паездак. Больш за тое, Лукашэнка выкарыстаў EW-001PA са сваёй сям’ёй і іншымі людзьмі са свайго атачэння для міжнародных паездак», — гаворыцца ў паведамленні Мінфіна ЗША.
Санкцыі прывядуць да блакавання актываў у выпадку, калі яны знаходзяцца на тэрыторыі ЗША, а таксама арганізацый, якія на 50% і больш належаць названым у спісе асобам або кампаніям. Супрацоўніцтва з унесенымі ў спіс структурамі можа прывесці да другасных санкцый, адзначаецца ў паведамленні.