«Прыёрбанк», які ўваходзіць у аўстрыйскую групу кампаній Raiffeisen Bank International (RBI), можа перайсці пад крыло расійскага «Сбербанка», сцвярджае аўстрыйскае выданне Der Standard. RBI абмяркоўвае магчымы абмен сваёй даччынай крэдытнай арганізацыі «Райфайзенбанка» ў РФ на еўрапейскія актывы расійскай фінустановы. Тым часам «Прыёрбанк» папярэдзіў кліентаў, што цяпер недаступныя аперацыі па дамовах давернага кіравання, а таксама паведаміў пра праблемы з плацяжамі ў далярах.
Адзін з варыянтаў па магчымай угодзе RBI і «Сбербанка» — перадача расійскай фінустанове беларускага «Прыёрбанка».
Як паведамляла выданне Office Life, у «Прыёрбанку» адмовіліся каментаваць інфармацыю аўстрыйскіх СМІ пра абмен актывамі. Там сказалі, што гэтае пытанне не ў кампетэнцыі беларускай фінустановы, і перанакіравалі ў Raiffeisen Bank International.
Якія праблемы ўзніклі ў «Прыёрбанка»
16 сакавіка «Прыёрбанк» паведаміў, што «часова прыпыненыя аперацыі ў рамках дамоваў давернага кіравання грашовымі сродкамі». Гэта растлумачылі рашэннем брокера ў Raiffeisen Bank International. «„Прыёрбанк“ актыўна працуе над аднаўленнем гандлю каштоўнымі паперамі», — паведамілі ў беларускай фінустанове.
У пачатку сакавіка «Прыёрбанк» папярэдзіў кліентаў пра праблемы з плацяжамі ў далярах з 6 сакавіка, піша тэлеграм-канал «Бизнес в ЕАЭС». «На жаль, даводзіцца сёння нам з вамі жыць і будаваць бізнес ва ўмовах жорсткіх міжнародных санкцый і абмежаванняў», — адзначалі ў банку.
У банку таксама паведамілі, што ў лютым замежныя банкі-карэспандэнты выставілі новыя патрабаванні па ўмовах працы. У гэтай сітуацыі «Прыёрбанк» абвясціў, што з 6 сакавіка спыніў плацяжы ў далярах у краіны ЕС, Швейцарыю і Расію (за выключэннем плацяжоў у «Райфайзенбанк» звыш 10 000 даляраў). З гэтай даты банк павысіў мінімальны памер плацяжу ў далярах — да 10 000 даляраў (абмежаванне не датычыць толькі плацяжоў у/з Кітая) і павысіў тарыфы на плацяжы ў далярах — да 0,15% ад сумы (мінімум 100 рублёў, максімум — 800 рублёў).
«Адна з самых праблемных краін па плацяжах — Канада. Плацяжы ў Літву ў еўра праходзяць толькі праз Medicinos Bankas. Па ўваходных плацяжах ніякіх праблем няма з любых краін у любых валютах. Усё, што залічваецца ў „Прыёрбанк“, усё даходзіць да кліентаў. У далярах прымаюць уваходныя плацяжы 7 банкаў Беларусі. Але некаторыя банкі цяпер прымаюць даляры толькі ў адрас сваіх кліентаў», — паведамляе тэлеграм-канал.
«Прыёрбанк «7 сакавіка таксама выпусціў дадатковыя тлумачэнні па валютных плацяжах.
Якія абмежаванні ўводзіць «Прыёрбанк»
«Прыёрбанк» раней абвясціў, што з 1 красавіка будзе патрабаваць пашпарт у кліентаў, якія папаўняюць рахункі наяўнымі праз касы банка. Гэты дакумент трэба будзе паказваць у выпадках, калі сума перавысіць 50 базавых велічынь (на сёння гэта 1850 рублёў). Пры адмове паказаць пашпарт банк можа адмовіць у паслузе.
З 1 красавіка банк таксама перастане прымаць у сваіх касах наяўныя для плацяжоў праз АРІП. Здзейсніць такія аперацыі можна будзе праз прылады самаабслугоўвання — банкаматы, інфакіёскі, плацежныя тэрміналы, а таксама праз інтэрнэт-банкінг або мабільную праграму.
З 1 ліпеня «Прыёрбанк» увядзе абмежаванне ў 50 базавых велічынь на адну аперацыю па аплаце паслуг наяўнымі ў прыладах самаабслугоўвання праз АРІП. Такі ліміт з’явіцца таксама на аперацыі па папаўненні рахунку наяўнымі.