Падчас дагляду ў аэрапорце Тэгу ў Паўднёвай Карэі мытнікі запатрабавалі ад 30-гадовай падарожніцы, імя якой не ўдакладняецца, раздзецца і паказаць гігіенічную пракладку. Жанчыну западозрылі ў правозе наркотыкаў. Пра гэта піша «Холод» са спасылкай на The Korea Herald.
Як піша выданне са спасылкай на звесткі мытні, жанчына ляцела ў Паўднёвую Карэю з Філіпін 8 кастрычніка. На кантрольна-прапускным пункце сканер паказаў, што ў яе валізе — наркотыкі. Пасля высветлілася, што гэта была вадкасць для электронных цыгарэт.
Мытнікі выкарысталі іншы сканер, на міліметровых хвалях, які паказвае прадметы, прымацаваныя да цела чалавека пад адзеннем. Прылада зрэагавала на нейкі прадмет у раёне штаноў, які аказаўся пракладкай.
Падарожніцу адвялі ў асобны пакой, дзе змусілі зняць пракладку і паказаць супрацоўніцы мытні. Праверка доўжылася 20 хвілін, пасля чаго мытнікі вырашылі, што ў жанчыны няма ніякіх наркатычных рэчываў, і адпусцілі яе.
Жанчына расказала, што інцыдэнт у аэрапорце выклікаў у яе моцны стрэс і вагінальны крывацёк, які доўжыўся пяць дзён. На тое, што адбылося, бурна адрэагавалі карыстальнікі сацсетак, пасля чаго мытні давялося выпусціць заяву, у якой гаварылася пра спраўнасць апаратуры ў аэрапорце.
У дакуменце сказана, што іённы сканер выяўляе малекулярныя структуры, якія нагадваюць наркатычныя рэчывы, і паколькі малекулярны склад вадкасці для электронных цыгарэт быў падобны да складу наркотыкаў, сканер на яе зрэагаваў.
Адносна надгляду мытня заявіла, што «гэта была непазбежная мера, улічваючы нядаўні рост выпадкаў кантрабанды наркотыкаў шляхам хавання іх у целе».