Складана і рызыкоўна, але ўсё атрымалася. Упершыню ў свеце дактары здолелі перасадзіць генна-мадыфікаваную нырку свінні чалавеку

Дактары Масачусэтскай бальніцы ў Бостане паспяхова правялі першую ў свеце трансплантацыю генетычна мадыфікаванай ныркі свінні чалавеку. Пра гэта паведаміў тэлеканал CNN са спасылкай на прэс-службу клінікі.

21 сакавіка на прэс-канферэнцыі па выніках аперацыі медыкі расказалі, што перасадка органа адбылася 16 сакавіка і доўжылася чатыры гадзіны. Паводле доктара Тацуа Каваі, які кіраваў працэдурай, адразу пасля трансплантацыі свіная нырка «паружавела» і пачала функцыянаваць, што выклікала апладысменты ва ўсяго медперсаналу. Каваі прызнаўся, што гэта «найпрыгажэйшая нырка», якую ён калі-небудзь бачыў.

Нырка ад донара-свінні была прадастаўленая кампаніяй eGenesis са штата Масачусэтс. Геном гэтай жывёліны быў адрэдагаваны з выкарыстаннем тэхналогіі CRISPR-Cas9 для выдалення шкодных генаў свінні і дадавання пэўных чалавечых генаў для паляпшэння сумяшчальнасці з людзьмі — гэта мусіць знізіць рызыку адрынання перасаджанага органа.

Пацыентам стаў 62-гадовы Рык Слэйман, менеджар Дэпартамента транспарту Масачусэтса, які сутыкнуўся з цяжкім захворваннем нырак. Ён быў удзельнікам праграмы трансплантацыі бальніцы цягам 11 гадоў. У 2018 годзе яму трансплантавалі донарскую чалавечую нырку, але неўзабаве яна адмовіла.

Аперацыя па перасадцы свіной ныркі прайшла паспяхова, і пацыент, як чакаецца, хутка будзе выпісаны з бальніцы. Дактары сцвярджаюць, што новая нырка можа праслужыць гады, аднак прызнаюць, што ў галіне трансплантацыі органаў жывёл людзям яшчэ шмат невядомых.

Нягледзячы на поспех аперацыі, даследчыкі заклікаюць да далейшых даследаванняў, каб лепш зразумець эфектыўнасць трансплантацыі нырак свінні. Яны падкрэсліваюць неабходнасць вялікіх клінічных даследаванняў для поўнай ацэнкі патэнцыялу гэтага метаду лячэння.

Тым не менш трансплантацыя генетычна мадыфікаваных органаў свінні адкрывае новую эру ў медыцыне і можа стаць ключом да выратавання тысяч жыццяў людзей, якія чакаюць аперацыі.